മനുഷ്യശരീരം എന്നത് കേവലം ഒരു ജൈവയന്ത്രം (Biological Machine) മാത്രമാണെന്ന് ശാസ്ത്രം ഓരോ ദിവസവും തെളിയിച്ചുകൊണ്ടിരിക്കുകയാണ്. പണ്ട് അത്ഭുതമായിരുന്ന പല കാര്യങ്ങളും ഇന്ന് യാഥാർത്ഥ്യമാണ്. ഹൃദയമിടിപ്പ് നിലച്ചാൽ കൃത്രിമ ഹൃദയം വെക്കാം, കൈകാലുകൾ നഷ്ടപ്പെട്ടാൽ തലച്ചോറിന്റെ സിഗ്നലുകൾ സ്വീകരിക്കുന്ന ആർട്ടിഫിഷ്യൽ ലിംബുകൾ (Bionic Limbs) ഘടിപ്പിക്കാം. ശരീരത്തിലെ ഓരോ ഭാഗവും മാറ്റിസ്ഥാപിക്കാവുന്ന സ്പെയർ പാർട്സുകൾ മാത്രമായി മാറിക്കൊണ്ടിരിക്കുന്നു. ഇവിടെ എവിടെയാണ് നാം പറയുന്ന 'മാറ്റമില്ലാത്ത ആത്മാവ്'?
ഇലോൺ മസ്കിന്റെ ന്യൂറലിങ്ക് (Neuralink) പോലുള്ള പരീക്ഷണങ്ങൾ വിജയിക്കുന്നതോടെ വിപ്ലവം അതിന്റെ പൂർണ്ണതയിലെത്തും. നമ്മുടെ തലച്ചോറിനെ നേരിട്ട് കമ്പ്യൂട്ടറുകളുമായി ബന്ധിപ്പിക്കാൻ കഴിയുന്ന കാലം വിദൂരമല്ല. ഒരു ചിപ്പിലൂടെ നമ്മുടെ ചിന്തകളെയും ഓർമ്മകളെയും ഡിജിറ്റൽ ലോകത്തേക്ക് മാറ്റാൻ കഴിഞ്ഞാൽ, 'ചാപ്പി' എന്ന സിനിമയിൽ കണ്ടതുപോലെ ശരീരം മരിച്ചാലും മനുഷ്യൻ ഒരു സോഫ്റ്റ്വെയറായി നിലനിൽക്കും. അവിടെ മരണമില്ല, അവിടെ പ്രായമില്ല. ഇത് കേവലം ഭാവനയല്ല, ശാസ്ത്രത്തിന്റെ അടുത്ത ഘട്ടമാണ്.
"ഞാൻ ആരാണ്?" എന്ന ചോദ്യത്തിന് അപ്പോൾ ഒരു ഉത്തരമേയുള്ളൂ: "ഞാൻ എന്റെ ഓർമ്മകളാണ്." ഞാൻ ആർജ്ജിച്ച അറിവുകളും, എന്റെ ബോധ്യങ്ങളും, മറ്റുള്ളവരുടെ മനസ്സിൽ ഞാൻ ഉണ്ടാക്കിയ സ്നേഹനിർഭരമായ ഓർമ്മകളുമാണ് ഞാൻ. ഞാൻ മറ്റുള്ളവർക്ക് സന്തോഷം നൽകുന്ന ഓർമ്മയാണെങ്കിൽ അവർക്ക് ഞാൻ ഒരു നല്ല മനുഷ്യനാണ്; മറിച്ചാണെങ്കിൽ ഞാൻ വെറുമൊരു മോശം അനുഭവമാണ്. ഈ ഓർമ്മകൾ ഒരു ശരീരത്തിലാണോ അതോ ഒരു ചിപ്പിലാണോ എന്നതിൽ എന്ത് പ്രസക്തിയാണുള്ളത്?
ആത്മീയതയുടെ പേരിൽ ഭയവും ചൂഷണവും വിൽക്കുന്നവർക്ക് ഈ ശാസ്ത്ര സത്യങ്ങൾ വലിയൊരു തിരിച്ചടിയാണ്. "ദൈവഹിതം" എന്ന് പറഞ്ഞ് അസുഖങ്ങളെയും മരണത്തെയും ഭയപ്പെടുത്തി പണം തട്ടുന്ന വ്യാജ ആത്മീയതയുടെ അടിത്തറയാണ് ഇവിടെ തകരുന്നത്. ശരീരത്തെ ഒരു യന്ത്രമായി കാണാനും, ബുദ്ധിയെ അറിവായി കാണാനും പഠിച്ചാൽ ഒരു ആത്മീയ ചൂഷകനും നിങ്ങളെ ഭയപ്പെടുത്താൻ കഴിയില്ല. അന്ധമായ വിശ്വാസങ്ങൾക്കപ്പുറം അറിവിന്റെ പ്രകാശമാണ് നമുക്ക് വേണ്ടത്.
ഭാവിയുടെ മനുഷ്യൻ എന്നത് മാംസവും ലോഹവും ചിന്തകളും ചേർന്ന ഒരു അത്ഭുതമായിരിക്കും. നാം ഇന്ന് കാണുന്ന നമ്മുടെ രൂപം പരിണാമത്തിന്റെ ഒരു ഘട്ടം മാത്രമാണ്. കൂടുതൽ അറിവ് നേടുമ്പോഴും കൂടുതൽ സാങ്കേതികത കൈവരിക്കുമ്പോഴും നാം കൂടുതൽ വിനയമുള്ളവരാകണം. കാരണം, ഈ പ്രപഞ്ചത്തിലെ അനന്തമായ അറിവുകളുടെ മുന്നിൽ നാം ഓരോരുത്തരും ഓരോ ചെറിയ സ്പാർക്കുകൾ മാത്രമാണ്. ചൂഷണങ്ങൾക്കെതിരെ കണ്ണുതുറക്കാം, ശാസ്ത്രീയ ബോധമുള്ള ഒരു തലമുറയെ കെട്ടിപ്പടുക്കാം.
സ്നേഹപൂർവ്വം,
സുധീർ കബീർ
(Anti-Awareness Group)
https://chat.whatsapp.com/ICzDnFo41dCHjbR6qGkrPG